Градежен институт Македонија беше еден од поддржувачите на хакатонот „Младински идеи за одржливи градби“, одржан на 27 февруари, во организација на Институтот за истражување во животна средина, градежништво и енергетика  и Градежниот факултет – Скопје.

На настанот учествуваа 17 тимови гимназијалци, кои работеа на две сценарија: „Циркуларен кампус – одржливо училиште на иднината“, со фокус на образовни простори со нула отпад и максимална енергетска независност, и „Циркуларна трансформација на напуштен јавен објект“, односно вдахнување нов живот на заборавените градби преку принципите на одржливоста.

Покрај поддршката на настанот, претставници на ГИМ беа дел од двете жири-комисии кои ги оценуваа решенијата на тимовите по двете сценарија. За нас ова беше можност да го споделиме искуството од практиката со генерации кои допрва ја избираат својата професија, но и директно да слушнеме како младите размислуваат за материјалите, енергетската ефикасност и одржливото градење.

Вложувањето во млади кадри е дел од долгорочната определба на ГИМ. Ваквите настани им овозможуваат на средношколците да стекнат практични знаења, да работат тимски на реални еколошки предизвици и да остварат директен контакт со факултетите и компаниите од секторот – што е основа за подготвен и стручен кадар во градежништвото во иднина.